Maiatzaren 29tik 31ra, OCR oztopo lasterketaren Europako lehiaketa egin da Irunen. Erdigunea Larreaundiko futbol zelaian izan dute. Giroa, berriz, pil-pilean zen Irunen. Ertzaintzak bere polizia eredua zein den erakutsi berri du Sumud Flotillako euskal biktima zaurituei egurra banatuz. Bada, Palestinako genozidioaren erdian, Israelek, Europan ere ez dagoenak, lehiaketan parte hartzen zuen. Maiatzaren 28an, parte-hartze hori bezala, euskal lasterkarien ordezkaritza batek salatu zuen eragotzi egin zitzaiela Euskal selekzioko kamisetak eramatea.
Oraintxe, OCR ez da nazioartean onartuta dagoen kirol bat, pentatloiaren diziplina bat baizik. Bertan parte hartu dutenak ez daude federatuta. OCR txapelketa hau OCRA du antolatzaileen artean, Espainiako erakunde pribatu bat, baita FISO Europako ligen koordinazioa eta Denontzat Irun taldea. Beraz, ez da ekimen ofizial bat. Lehiaketan, Europako talde nazionalek parte hartu dute, baina Euskal Herriari berariaz ukatu zaio parte hartzea. Irungo Udalak 70.000 euroko laguntza eman dio Espainiako antolakuntzari.
Antolakuntzak eragotzi egin die euskal korrikalariei Euskal selekzioaren kamisetaz ateratzea, Euskal Selekzioak dohainik eskainia. Are, nahitaezkoa zen Espainiakoa eramatea, hala irteeran nola helmugan. Parte hartu duten hainbat euskal herritar ataka batean jarri ditu, eta nahitaezkotasun hori saihesteko estrategiak eztabaidatu dituzte. Lehiakide askok ez dute elkar ere ezagutzen, nork bere kabuz asmatu behar izan du zer egin eta inposizio nazionala nola saihestu. Gauzak okertuz, lehiaketak iraun duen denbora osoan, euskararen presentzia hutsaren hurrengoa izan da, eta egin den gutxia ia barkamena eskatzen. EAEko hizkuntza propioaz, eta ofizialaz.
Euskal selekzioak bertako kamisetaz korri ahal izateko eskaera egin zuen, baina alferrik. Lasterkari askorengan, deskalifikazio mehatxuak efektua egin du, eta Espainiako kamiseta behartua jantzi dute. Beste batzuek, berriz, proba hasi eta kamiseta bidean uztea erabaki dute, eta proba disfrutatu, inongo errekonozimendurik gabe, edo arazoak izan dituzte. Izan ere, Espainiako kamisetarik gabe helmugaratzean deskalifikatuak izan dira. Irungo lehiaketan, proba lehiakorretan parte hartu ahal izateko, lasterkari horiek kanporaketak egin dituzte lehendabizi, eta sailkatu, eta, izena emateko, 500 euro arteko dirutza ordaindu dute batzuetan. Nahitaezkoa zen antolatzaileei Espainiako kamiseta erostea, 60 euro inguru batez beste.
Franco hil zenetik 50 urte eta gehiago joan direnean, artean ere euskal klandestino izaten jarraitzen dugu, ukatuak geure herrian, ataka kolonial batean. Eta hori guztia Munduko Futbol Txapelketaren atarian, Espainiako selekzioaren gorabeherekin euskaldunok etengabeko matraka jasan behar izango dugunean.
Oharra: Azpimarratzekoa da aurtengo martxoan Marko Usabiaga atleta donostiarrak, OCRko aurreko lehiaketa batean Europako txapelduna izan zenak, uko egin ziola Espainiako selekzioarekin parte hartzeari Irungo aurtengo txapelketan. Ez zuela Espainia ordezkatu nahi azaldu zuen Usabiagak. Txalotzekoa da atleta euskaldun horren jarrera ausarta, Espainiako ordezkarien mehatxuen aurrean tinko eutsi baitio bere uko horri. Irungo txapelketaren kutsu anti-euskaldunak Usabiagaren erabakiari arrazoi gehiago eman dizkio.
